شوية حكي فلسطيني
شوفووووووووووو
ارجو ان تقرا بتمعن
هاظا يا جماعة الخير بدّي أخرّفكوا هالخرّافيّة
يعني هظيك الخطرة ، عنّ على خاطري كبّاية شاي بالمريّميّة خمير على البرود عند المغربيّات ، قمت صحِت عالختيارة ، وقلتلها يا أم عوظ ، الله يرظى عليكي ، ساوي لنا بكرج شاي ، خلّينا نِنْغَدُه على العتبة بفيّات سجرة الكينا الكبيرة ، بس بالأول شيلي هالرّابش اللّي هون وهاتي هالمُصلحة وزبطّي لنا هالسّهلة قدّام الدار ، والله خالتكو أم عوظ ما كذبّت خبر ، زبّطت الوظع ، وفردت القياس ، و رتّبت هالمساند ، وجابت صونيّة الشاي والكبّايات ، وأنا إنجَعَصِت على جنبي مثل الكُبار ، وبلّشت أعفّر بهالتِتِن ، وبعدني يا دوب شّعلت أوّل سُكارة ، إلا وأوبة قواريط فرعت من غاد ، وصاروا يلعبوا بالفطبول قدامنا ‘ قمت أنا فِلِتهُمْ عشان أطحيهم ، ولكو يا ولادين المقاطيع ، على نصتكو هه ، بدّيش أسمع ولا هفَسة هون ، روحوا تهاملوا بغير مطرح ، روحوا تخيّيوا وإلعبوا بالحاكورة ، ولّلا إسّة بحسب الله ما خلقكم ، قامت أم عوظ قالت ، إخطية ، دشّرهم يلعبوا وين ما بدهم ، ماهي الكُرّيستة للكل ، عملت لها خاطر وقعدت وسِبِتْهم بحالهم ، إلاّ بعد شوي واحد إبن حرام شاط الفطبول مثل الطّلّق ، وجابو بنص الخابية ، طاحت الخابية عالأرض ، وسالت الميّ عالأرظيات ، قلت لا حول ولا قوّة إلا بالله على قاروط العزا هاظ ، ونَهَرِت فيه : ولك يحرق صفحة أبو اللّي خلّف سنسفيل جدودك بحفّاية عتيقة ، ولك إبن مين إنتِ يا عجي ؟ بس لو بعرف قرميّة أبوك منين يا وبش ، جَحَرني بعينه مثل البسّ الجربان وما ردّش ، قلت له بسيطة ، والله لما أقظبّك لأمصَع رقبتك مَصِع وأطبّش نيعك تطبيش يا خويثة ، أنا بفرجيك
رجعت إنجَعيت بمحلّي ، وقلت لحالي ، الله بيعوّظ عليك يا أبو عوظ بحق الخابية ، خلص إنسى وعفّر عليها تنجلي ، وبعدني يادوب أوّل سحبة من السُكارة ، وأوّل نغدة شاي ، إلاّ وأسمع لكو حِسّ طومبيل جاي من بعيد مثل الطير ، بعدين شحطة فرام ، ما وعيت أبَحّر بعيوني إلاّ وقاروط من هالقواريط مدهوك ، مسطوح على ظهره ودماياه حماياه ، لا من ثمّه ولا من كمّه ، ركظت أنا وأم عوظ فارعين دارعين ، وصارت أم عوظ تندب وتولول ، عزّااااااااااااا عليك يا إبن أم كايد ، الله يصطرك وما يكون الفُشُخ براسك غميق ، وأنا تقَرْبَطِت بلعين الوالدين الشوفير ، وخَمَعْته ظرب بالباكورة على صباحه ، وصيّحت فيه : ولك يا خايس ، بتشوفش ، وين شارد يا وَكْسِة ، شو كنّك مؤجّر الطابق الفوقاني ، بعدين إذا نظرك شيش بيش حطّلك دربيل عشان تطَسّ مثل البني آدمين ، قام صار يتبكبك مثل النسّاوين ، وتجمّعوا عليه الزّلم ، ووين الجنب اللي بوجعك ، نهنهوه من البُكسات والكماميد والدّع على قفاه والشلاليط والرفش بنص بطنه حتّى صار مثل الشريطة ، بعدين نَتَعناه هو والصّبي على السبيطار ، ولمّا شافهم الحكيم ، غزوزهم أكمّن إبرة ، وكتب لهم روشيتة دوا ، وقال إرجعوا ورا شي جمعتين بعطيكوا الرّابور
حملنا حالنا ورّوحنا عالدّار ، لا تهنّينا بكبّاية شاي ، ولا بسُكارة ، ولا بشحار، لأنّه القعدة اللّي تمنّيناها إجت على روسنا عامصْ
__________________
شرح المفردات
هظيك الخطرة = تلك المرّة
بكرج شاي = إبريق شاي
نِنْغَدُه = نشربه ، من نَغَد ينغدُ نغداً
الرّابش = الكراكيب والأغراض القديمة من rubbish
المُصلحة = المكنسة
السّهلة = المكان
القياس = حصيرة القش
إنجَعَصِت = إتكأت
الكُبار = الأكابر
أعفّر بهالتِتِن = أدخّن بالدخّان
أوبة = شلّة
قواريط = أولاد
فرعت = جاءت مسرعة
من غاد = من بعيد
فِلِتهُمْ = زجرتهم
أطحيهم = أطردهم
على نصتكو = على السكت أو إخرسوا
هفَسة = صوت أو حركة
تخيّبوا = إنقلعوا
الحاكورة = بستان صغير
إخطية = حرام
دشّرهم = إتركهم
الكُرّيستة = الشارع
مثل الطّلّق = سريع جدا
الخابية = جرّة الميّ
طاحت = وقعت
نَهَرِت = زجرت
ولك يحرق صفحة أبو اللّي خلّف سنسفيل جدودك بحفّاية عتيقة = ما بدها شرح
عجي = ولد
جَحَرني =نظر إلي بإزدراء
أقظبّك = أمسكك أو ألقي القبض عليك
لأمصَع رقبتك = أخلع رقبتك
أطبّش نيعك = أكسر حنَكَك
خويثة = أهبل
إنجَعيت = جلست متكئاً
حِسّ طومبيل = صوت سيّارة
أبَحّر = أتطلّع أو أرنو
مدهوك = مدعوس أو مصدوم بالسيارة
لا من ثمّه ولا من كمّه = منتهي عالخالص
فارعين دارعين = مسرعين جدا
عزّااااااااااااا عليك = يا ويلي عليك
الفُشُخ = الجرح
تقَرْبَطِت = أمسكت به
وخَمَعْته ظرب بالباكورة على صباحه = ضربته بالعكازة على جبينه
خايس = ***
وَكْسِة = هامل
مؤجّر الطابق الفوقاني = ما فيك عقل
نظرك شيش بيش = ما بيشوف مليح
دربيل = منظار أو ناظور
عشان تطَسّ = عشان تشوف
نهنهوه = ضربوه ضربا مبرحا
والكماميد والدّع = مفردها كمّاد وهي ضربة بالكوع على الظهر
نَتَعناه هو والصّبي على السبيطار = حملناه إلى المستشفى
روشيتة دوا = وصفة دواء
إرجعوا ورا شي جمعتين بعطيكوا الرّابور = تعالو بعد أسبوعين لأجل التقرير الطبي من report
إجت على روسنا عامصْ = لم تنتهي على خير
شوفووووووووووو
ارجو ان تقرا بتمعن
هاظا يا جماعة الخير بدّي أخرّفكوا هالخرّافيّة
يعني هظيك الخطرة ، عنّ على خاطري كبّاية شاي بالمريّميّة خمير على البرود عند المغربيّات ، قمت صحِت عالختيارة ، وقلتلها يا أم عوظ ، الله يرظى عليكي ، ساوي لنا بكرج شاي ، خلّينا نِنْغَدُه على العتبة بفيّات سجرة الكينا الكبيرة ، بس بالأول شيلي هالرّابش اللّي هون وهاتي هالمُصلحة وزبطّي لنا هالسّهلة قدّام الدار ، والله خالتكو أم عوظ ما كذبّت خبر ، زبّطت الوظع ، وفردت القياس ، و رتّبت هالمساند ، وجابت صونيّة الشاي والكبّايات ، وأنا إنجَعَصِت على جنبي مثل الكُبار ، وبلّشت أعفّر بهالتِتِن ، وبعدني يا دوب شّعلت أوّل سُكارة ، إلا وأوبة قواريط فرعت من غاد ، وصاروا يلعبوا بالفطبول قدامنا ‘ قمت أنا فِلِتهُمْ عشان أطحيهم ، ولكو يا ولادين المقاطيع ، على نصتكو هه ، بدّيش أسمع ولا هفَسة هون ، روحوا تهاملوا بغير مطرح ، روحوا تخيّيوا وإلعبوا بالحاكورة ، ولّلا إسّة بحسب الله ما خلقكم ، قامت أم عوظ قالت ، إخطية ، دشّرهم يلعبوا وين ما بدهم ، ماهي الكُرّيستة للكل ، عملت لها خاطر وقعدت وسِبِتْهم بحالهم ، إلاّ بعد شوي واحد إبن حرام شاط الفطبول مثل الطّلّق ، وجابو بنص الخابية ، طاحت الخابية عالأرض ، وسالت الميّ عالأرظيات ، قلت لا حول ولا قوّة إلا بالله على قاروط العزا هاظ ، ونَهَرِت فيه : ولك يحرق صفحة أبو اللّي خلّف سنسفيل جدودك بحفّاية عتيقة ، ولك إبن مين إنتِ يا عجي ؟ بس لو بعرف قرميّة أبوك منين يا وبش ، جَحَرني بعينه مثل البسّ الجربان وما ردّش ، قلت له بسيطة ، والله لما أقظبّك لأمصَع رقبتك مَصِع وأطبّش نيعك تطبيش يا خويثة ، أنا بفرجيك
رجعت إنجَعيت بمحلّي ، وقلت لحالي ، الله بيعوّظ عليك يا أبو عوظ بحق الخابية ، خلص إنسى وعفّر عليها تنجلي ، وبعدني يادوب أوّل سحبة من السُكارة ، وأوّل نغدة شاي ، إلاّ وأسمع لكو حِسّ طومبيل جاي من بعيد مثل الطير ، بعدين شحطة فرام ، ما وعيت أبَحّر بعيوني إلاّ وقاروط من هالقواريط مدهوك ، مسطوح على ظهره ودماياه حماياه ، لا من ثمّه ولا من كمّه ، ركظت أنا وأم عوظ فارعين دارعين ، وصارت أم عوظ تندب وتولول ، عزّااااااااااااا عليك يا إبن أم كايد ، الله يصطرك وما يكون الفُشُخ براسك غميق ، وأنا تقَرْبَطِت بلعين الوالدين الشوفير ، وخَمَعْته ظرب بالباكورة على صباحه ، وصيّحت فيه : ولك يا خايس ، بتشوفش ، وين شارد يا وَكْسِة ، شو كنّك مؤجّر الطابق الفوقاني ، بعدين إذا نظرك شيش بيش حطّلك دربيل عشان تطَسّ مثل البني آدمين ، قام صار يتبكبك مثل النسّاوين ، وتجمّعوا عليه الزّلم ، ووين الجنب اللي بوجعك ، نهنهوه من البُكسات والكماميد والدّع على قفاه والشلاليط والرفش بنص بطنه حتّى صار مثل الشريطة ، بعدين نَتَعناه هو والصّبي على السبيطار ، ولمّا شافهم الحكيم ، غزوزهم أكمّن إبرة ، وكتب لهم روشيتة دوا ، وقال إرجعوا ورا شي جمعتين بعطيكوا الرّابور
حملنا حالنا ورّوحنا عالدّار ، لا تهنّينا بكبّاية شاي ، ولا بسُكارة ، ولا بشحار، لأنّه القعدة اللّي تمنّيناها إجت على روسنا عامصْ
__________________
شرح المفردات
هظيك الخطرة = تلك المرّة
بكرج شاي = إبريق شاي
نِنْغَدُه = نشربه ، من نَغَد ينغدُ نغداً
الرّابش = الكراكيب والأغراض القديمة من rubbish
المُصلحة = المكنسة
السّهلة = المكان
القياس = حصيرة القش
إنجَعَصِت = إتكأت
الكُبار = الأكابر
أعفّر بهالتِتِن = أدخّن بالدخّان
أوبة = شلّة
قواريط = أولاد
فرعت = جاءت مسرعة
من غاد = من بعيد
فِلِتهُمْ = زجرتهم
أطحيهم = أطردهم
على نصتكو = على السكت أو إخرسوا
هفَسة = صوت أو حركة
تخيّبوا = إنقلعوا
الحاكورة = بستان صغير
إخطية = حرام
دشّرهم = إتركهم
الكُرّيستة = الشارع
مثل الطّلّق = سريع جدا
الخابية = جرّة الميّ
طاحت = وقعت
نَهَرِت = زجرت
ولك يحرق صفحة أبو اللّي خلّف سنسفيل جدودك بحفّاية عتيقة = ما بدها شرح
عجي = ولد
جَحَرني =نظر إلي بإزدراء
أقظبّك = أمسكك أو ألقي القبض عليك
لأمصَع رقبتك = أخلع رقبتك
أطبّش نيعك = أكسر حنَكَك
خويثة = أهبل
إنجَعيت = جلست متكئاً
حِسّ طومبيل = صوت سيّارة
أبَحّر = أتطلّع أو أرنو
مدهوك = مدعوس أو مصدوم بالسيارة
لا من ثمّه ولا من كمّه = منتهي عالخالص
فارعين دارعين = مسرعين جدا
عزّااااااااااااا عليك = يا ويلي عليك
الفُشُخ = الجرح
تقَرْبَطِت = أمسكت به
وخَمَعْته ظرب بالباكورة على صباحه = ضربته بالعكازة على جبينه
خايس = ***
وَكْسِة = هامل
مؤجّر الطابق الفوقاني = ما فيك عقل
نظرك شيش بيش = ما بيشوف مليح
دربيل = منظار أو ناظور
عشان تطَسّ = عشان تشوف
نهنهوه = ضربوه ضربا مبرحا
والكماميد والدّع = مفردها كمّاد وهي ضربة بالكوع على الظهر
نَتَعناه هو والصّبي على السبيطار = حملناه إلى المستشفى
روشيتة دوا = وصفة دواء
إرجعوا ورا شي جمعتين بعطيكوا الرّابور = تعالو بعد أسبوعين لأجل التقرير الطبي من report
إجت على روسنا عامصْ = لم تنتهي على خير
